bROXAS CITY – Nakit-an na ang bangkay sang isa ka lalaki nga sakay sa tricycle kag magatabuk na kuntani sa suba sang Barangay Old Guia kag Barangay New Guia, Maayon, Capiz sadtong Disyembre 2, 2020.
Ginkilala ang biktima nga si Cornillo Dapulasa 50-anyos kag residente sang Barangay New Guia sa nasambit nga banwa.
Base sa pagpanalawsaw sang Bombo Radyo nga nakita na lamang ni Ricky Fabiano sang Estancia, Iloilo ang biktima nga yara nasangit sa dalutdot sa suba sang Manlupa kun sa diin ginapahayag nga 18 kilometros ang kalayuon gikan sa suba sang Brgy. Old Guia kag New Guia sang amo nga banwa.
Matandaan nga nagpangayo pa sang bulig ang biktima sa tanod matapos nga hinali na lamang nga nagpundo sa tunga sang tulay ang ginamaneho nga tricycle.
Bangud diri, nagpanaog pa ang biktima agud magpangayo sang bulig sa tanod para nga pabalikon na lamang kuntani sa babaw ang tricycle.
Gilayon naman nga nagkuha sang pisi ang tanod apang ginkatingala na lamang sini nga pagbalik niya wala na ang tricycle kag nasambit nga biktima.
Nahibaluan nga naglapaw sa tulay ang tubig baha apang gintuyo sini sa gihapon nga magtabuk.
Suno naman sa pila ka mga residente sa Barangay Jebaca nga nakita pa nila ang biktima samtang ginaanod sang tubig kun sa diin nakasakay ini sa dalutdot kag nagapangayo sang tabang.
Apang, indi nila ini mabuligan bangud sa padayon man ini nga ginadala sang tubig.
Samtang, nakita-an naman ang tricycle sang biktima kahapon sa nasambit nga suba kun sa diin naghalin ang biktima.
