ROXAS CITY – (UPDATE) Yara na sa isa ka punerarya sa syudad sang Roxas, ang bangkay sang Construction worker nga na-igo sang kilat sa iya ginatrabahuan sa Poblacion Norte, banwa sang Ivisan.
Matandaan nga ginkilala ang biktima kay Niño Ocson, nga residente sang Barangay Lawaan, Roxas City.
Sandig sa dugang nga imbestigasyon ni PSSg Edward Peter Hari-on sang Ivisan MPS, ginpahayag nga una na-igu sang kilat ang kawayan nga nagaserbe pundasyon sa ila kagamitan sa trabaho, kag posible naglatay ang electrical current sa wiring, kun sa diin nagpanilong bangud sa pagbubo sang ulan, ang nasambit nga biktima.
Nasapwan nalang ini sang iya mga kaupdanan sa trabaho nga nagakulob na.
Nahibaluan nga suno sa tiayon sang biktima, ika-duha pa lamang nga adlaw sang iya bana sa pag-extra sa trabaho.
Ginkalain man sang buot sang Misis ni Ocson bangud suno diri inoras pa ang nakaligad antes ginpadangat sa RMPH ang iya bana.
