ROXAS CITY – Na-cremate na ang bangkay sang isa ka Filipino teacher nga naghikog sa balkonahe sang iya nga apartment sa Nonthaburi, Thailand.
Nasapwan ang bangkay ni Melvin Cacho 27-anyos nga may higot sa liog sa idalum sang air compressor sang ginarentahan nga apartment.
Nahibaluan nga nagatrabaho bilang manunudlo ang biktima sa isa ka government school sa Thailand sa diin ginapatuman ang no work no pay policy matapos nga nag-untat sa operasyon ang eskwelahan bangud sa epekto sang COVID-19 pandemic.
Nagbilin man sang suicide letters si Cacho sa diin ginpahayag sini nga depresyon ang nagtulod sa iya para magpanginmatay.
Nasaad pa sa sulat nga sobra na ini nga na-stress matapos madulaan sang trabaho, nagdugang pa ang kapaslawan nga malab-ot ang iya nga handum kag ang problema sa pamilya.
Nagpalab-ot man ini sang mensahe kay President Rodrigo Duterte nga buligan ang iya nga pamilya kag kun mahimo nga mapadala sa Pilipinas ang iya mga bagahe kag nabilin nga mga gamit.
Samtang masobra sa P100,000 ang natipon nga pondo sang Filipino Community sa Thailand para mabuligan ang pamilya ni Cacho.
