ROXAS CITY – Narekober na ang bangkay sang isa ka lalaki nga ginpahayag nalumos sa Barangay Sibaguan, Roxas City.
Ang biktima, amo si alyas “Niño,” 17-anyos kag residente sang Barangay Dinginan, Roxas City.
Sa interview sang Bombo Radyo kay SFO1 James Agarrado, Team Leader sang Special Force Capiz, ginpahayag niya nga nakabaton sila sang tawag sa ila talatapan sang las 3:36 sang hapon. Gilayon nga nag-responde ang ila team, kag sa sulod sang 6 ka oras nga search and rescue operation, narekober nila ang bangkay sang biktima pasado alas 9 sang gab-i.
Suno kay Agarrado, sang ila pag-abot sa lugar takna 3:48 sang hapon, gilayon nga nag-coordinate sila sa security guard para ma-locate ang lugar sang insidente. Gintudlo sila sa likod sang subdivision, kag didto nila nakit-an ang mga kabataan nga nagahilibion kag naga-panic.
Pahayag sang mga kabataan, nagkadto sila sa likod sang subdivision para magligo, apang anum lang sa ila ang nagpaligo lakip na ang biktima nga si alyas “Niño”.
Dugang pa sini nga nabudlayan sila sa pagrekober sang biktima bangud madalom ang suba kag mabaskog ang current sang tubig.
Sa bulig sang Bureau of Fire Protection, Philippine Coast Guard, Capiz Emergency Response Team, kag City Disaster Risk Reduction and Management Office, natigayon nga marekober ang lawas sang amo nga biktima.
Sa katapusan, nagpahanumdom si Agarrado sa mga kabataan nga magpabilin sa insakto nga lugar kag maglikaw sa padalos-dalos nga mga aksyon agud malikawan ang mga kasubong nga insidente.
