Nakilala na ang bangkay sang lalaki nga nasapwan sa kilid sang karsada sa Bago Chiquito, Panay, Capiz.
Positibo nga ginkilala ang biktima sang iya himata nga si Vicente Arostigue 73-anyos sang Poblacion Tinigban, President Roxas, Capiz.
Suno kay Loida Mae Alayon, hinablos sang biktima kag tag-iya sang karinderya nga malapit sa payag nga gina-estaran ni Arostique nga may maintenance sa sakit nga high blood ang tiyo.
Masami man ini nga nagalakat sa diin ila ini ginahambalan nga magtenir sa iya payag kag ila na lamang ini dul-ungan sang pagkaon.
Nagpamalibad naman ang pamilya ni Arostique nga ipaidalum pa sa post mortem examination ang bangkay sang ila himata bangud nagapati sila nga wala sang foul play sa kamatayon sini kag posible gin-atake kag natumba ini sa federoad sang Bago Chiquito, Panay.
Nauna diri, ginpahayag ni Barangay Kapitan Eleuperio Bulao nga nakita ni Elmer Baltero 61-anyos ang nasambit nga bangkay samtang nagapauli ini sa ila balay sa Barangay Bago Grande, Panay kaina sang aga.
Suno sa opisyal nga indi residente sang ila barangay ang biktima, apang sa ila pagpangusisa, pila ka mga residente ang nakadipara sa biktima nga nagamaneho sang trisikad pila ka adlaw antes ini nasapwan nga patay.
