Wala na sang kabuhi sang masapwan ang driver sang motorsiklo matapos makabunggo sa pader sa isa ka balay sa Barangay Cawayan, Carles, Iloilo.
Ginkilala ang driver sa kay Antonio Baclas Alfon Jr., 34-anyos, kag residente sang Barangay Natividad, Pilar, Capiz.
Sa nakuha nga impormasyon sang Bombo Radyo, ginpahayag nga ginabulubanta alas dos sang maga-aga pa natabu ang amo nga disgrasya apang wala ini madiparahan kag aga na sang nasapwan nga wala na sang kabuhi.
Dugang pa nga samtang ginasubay sang biktima ang dalanon sakay sang iya motorsiklo nagikan sa Barangay Tarong sa amo man nga banwa kag pag-abot sa Barangay Cawayan aksidente ini nga nabunggo sa pader.
Mahibaluan nga yara sa impluwensiya sang makahulubog nga ilimnon ang biktima sang natabu ang insidente.
Nag-angkon sang patal nga pilas sa ulo ang driver nga posible amo ang gintunaan sang iya kamatayon.
