ROXAS CITY – Gintransfer na sa syudad sang Iloilo ang bangkay sang municipal administrator sang banwa sang Pilar nga si John Heredia kaina sang aga.
Kapin sa 200 ka mga salakyan ang nag-convoy sa pagtransfer sa Iloilo sa bangkay ni Heredia nga matandaan ginluthang sang wala pa mahibaluan nga mga suspek sa guha sang isa ka hardware sa Barangay Lawaan, sining syudad sang Mayo, 2021.
Kalakip sa mga nag-upod sa pagdul-ong kay Heredia sa Iloilo ang iya pamilya, suod nga mga abyan, opisyales kag mga pumuluyo sang banwa sang Pilar, mga nabuligan sini kag iban pa.
Nahibaluan nga madamo nga mga abyan kag mga Capizeño ang naghinyo sa tiayon ni Heredia nga si Atty. Cris Heredia nga diri sa probinsiya sang Capiz ilubong ang municipal administrator sang Pilar.
Apang nagpangayo sang pasaylo si Atty. Heredia nga bisan gustuhon sini indi mahimo bangud iya ginakunsidera ang pamilya sang bana nga didto sa Iloilo.
Ginpasalamatan man sini ang tanan nga nagpalangga kag nagsuporta sa iya bana sang ini ang buhi pa bangud kalakip man sila sa mga nagahatag sang kabakud sa ila nga nabilin ni John.
Samtang ginpasiguro ni Atty. Heredia nga padayunon sini ang legasiya sang iya bana kalakip ang pagtinlo sa pamalakat sa gobyerno kag untaton ang korupsyon sa gobyerno.
