ROXAS CITY – Namisteryuhan sa karon ang pamilya sang 76 anyos nga tigulang nga ginlubong halos napulo ka tuig na ang nakaligad matapos natukiban sang ila ginpakutkot nga wala nagakaagnas ang ila himata.
Sa interview sang Bombo Radyo kay ginang Linda, ginpahayag sini nga ila ginpakutkot ang bangkay sang iya iloy nga napatay sadtong tuig 2008 kag ginlubong sa Christ the King Memorial Park sa Jaro, Iloilo agud isaylo kuntani sa pagalubngan sang anak sini nga napatay man sining damlag lang.
Apang tuman ang ila kakibot sang ginpabuksan ang lungon bangud halos wala sang ginbag-o sa itsura sang iya iloy nga kun lantawon suno sa iya, halos bag-o lamang napatay.
Mismo ang Bombo Radyo ang nagpadulong sa punerarya nga gindal-an sang ginpakutkot nga bangkay kag didto nakit-an nga sa pihak nga napulo ka tuig na ang nakaligad humalin sang ini ang ginlubong, wala sa gihapon naagnas ang lawas sini.
Mahibaluan nga ba-se sa death certificate nga gina-uyatan sang pamilya, napatay ang nasambit nga tigulang bangud sa stroke sadtong Setyembre 27, tuig 2008.
Gindugang pa ni ginang Linda nga mangin sila ang nagamuhan man kun ano ang luyag sini ipalab-ot sa ila bangud wala man nagapabatyag ang iya iloy humalin sang napatay ini.
