PANITAN, CAPIZ – Pilason ang duha ka mag-utod matapos ginpangbuno sang ila kalapit-balay sa Sitio Bantaaw, Brgy. Cogon, Panitan, Capiz kadungan sang Biyernes Santo sang Abril 20, 2025.
Ginkilala ang mga biktima nga sanday alyas Ronel, 32-anyos kag utod sini nga si alyas Ronnie, 29-anyos samtang ang suspek naman amo si alyas Dolfo, 31-anyos kag lunsay mga residente sang nasambit nga lugar.
Sa impormasyon nga nakuha sang Bombo Radyo nagikan sa Panitan Municipal Police Station, nagkadto sa balay sang suspek ang nanay sang mag-utod nga biktima kag naghinyo nga kun pwede pahinaan ang tunog sang sound system apang ginkaakig ini sang suspek kag ginpadulungan ang balay sang mga biktima. Diri kag may natabo nga komosyon sa tunga sang suspek nga si Dolfo kag ni alyas Ronnie kag ginbuno sang suspek si Ronnie nga naigo sa likod. Sang nabatian ni alyas Ronel ang natabo nga komosyon naguwa ini sa ila balay agud tambagan kuntani ang suspek kag iya utod apang ginbuno man ini sang suspek sa iya nawala nga dughan.
Gilayon nga ginpadangat sa Bailan District Hospital ang mag-utod nga biktima para dapatan sang nagakaigo nga pagbulong. Samtang nagpalagyo naman ang suspek matapos nakumiter ang krimen apang boluntaryo nga nag-surrender pasado alas 5:00 sang aga sa amo man nga adlaw Abril 18 apang ginhilway na ini karon sa prisohan bangud nagtakop na ang reglementary period of detention sini.
Sa karon, padayon ang imbestigasyon sang kapulisan sa nasambit nga insidente kag ginahulat nalang ang desisyon sang mga biktima kun mapasaka ang mga ini sang kaso.
