Wala sang na-record nga evacuees ang banwa sang Panitan kadungan sang pag-igo sang Bagyo Verbena.
Sa interview sang Bombo Radyo kay Mark Jay Dumol, Head sang Panitan Muncipal Disaster Risk Reduction and Management Office, iya ginpahayag nga mas ginpili sang mga pumuluyo ang magpabilin sa ila sini nga mga puluy-an bangud sa makabig mahina nga bugso sang hangin kag ulan kun ikumpara sa nagligad nga mga bagyo nga nag-agi.
Suno kay Dumol, nagpabilin sa gihapon nga handa ang talatapan kaupod ang local government unit sang Panitan sa pagpreparar sang mga pre-emptive measures agud nga gilayon nga mabuligan ang mga nagakinahanglan.
Pahayag pa niya, duha ka barangay roads ang nabalhag nga nalab-ot sang tubig bangud sang pag-ulan nga dala sang bagyo.
Samtang, gin-lift na sang local government sang Panitan ang suspensyon san klase subong nga adlaw matapos makakas na ang probinsya sang Capiz sa tropical cyclone wind signal.
Nagpanawagan man ang natungdan nga mangin alerto sa posibilidad nga pagtaas sang lebel sang tubig bangud isa ka catch basin ang banwa sang Panitan sa kalapit nga mga kabanwahanan.
