ROXAS CITY – Hugot nga ginabantayan kag ginapahanumdum ang mga pumuluyo sang banwa sang Pilar nga likawan ang magkuha, magbaligya kag magkaon sang mga shellfish partikular sa pila ka mga coastal area sang lugar.
Sa interview sang Bombo Radyo kay Mayor Arnaldo Perez sang banwa sang Pilar, ginpahayag sini nga sa sulod sang 24 ka mga barangay 10 diri ang yara sa coastal area nga delikado sa mga pumuluyo.
Matandaan nga sang damlag lang naglupok ang pahayag nga isa ang ginbawian sang kabuhi bangud sa ginkaon nga ginaalegar kontaminado sang Red Tide Toxin nga nagikan sa nasambit nga banwa.
Bangud sini, naka-alisto na ang katapo sang Pilar Municipal Police Station, mga Barangay kag Municipal Officials kag pila ka mga ahensya agud magbantay kag magmonitor sa mga residente sang amu nga lugar.
Samtang, lauman man suno sa alkalde sang pamilya sang nagtaliwan nga magahatag ang banwa sang nagakaigo nga bulig.
Mensahe sini sa Pilareño, mag-ugyon kag magbuliganay agud temprano nga matapna ang posible red tide sa ila lugar kag malikawan nga maglapta kag magdamo ini.
