President Roxas, Capiz -Ginpaidalum sa surgical lockdown ang banwa sang President Roxas epektibo subong nga adlaw.
Ginpahayag ni Mayor Receliste ‘’Tanoy’’ Escolin nga 14 sa 19 ka nangin symptomatic kag nakaangkon sang close contact sa tatlo ka nagpositibo sa COVID-19 ang nagpositibo sa amo nga virus.
Sa nasambit nga numero napulo ang gikan sa President Roxas, duha sa Barangay Dulangan, Pilar, tag isa sa Maayon kag Pontevedra.
Suno sa alkalde nga pagadalhon ang 14 ka mga nagpositibo sa COVID-19 sa Capiz Gym subong man nga adlaw.
Kalakip sa mga ginsaraduhan sa nasambit nga banwa ang entrance kag exit sang merkado publiko sa diin nahamtang ang grocery store nga ginapanag-iyahan sang mag-asawa nga nagpositibo sa COVID-19 kag pila ka mga Sityo sa nasambit nga banwa.//
Ginpasiguro man sang LGU sa Local Inter Agency Task Force nga padayon ang ila pagmonitor sa mga asymptomatic kag iban pa nga na-close contact sang nagpositibo sa COVID-19 agud indi na maglapta ang coronavirus disease.
Samtang sandig sa Executive order nga ginpaguha sang alkalde nga ginadumilian ang social gathering tobtob indi mabawi ang EO.
Ginpahanumdum man ni Mayor Escolin ang tanan nga magsuksok sang face mask kag face shield kag ipatuman ang social distancing sa diin sa ini nga pamaagi malikawan ang paglapta sang COVID-19.
