ROXAS CITY – Pagsipa sa serbisyo ang nangin rekomendasyon sang Office of the Ombudsman Visayas sa kapitan sang Barangay Tacas, sa banwa sang Pontevedra, Capiz matapos napamatud-an nga guilty sa paglapas sa section 3 sub paragraph E sang RA 3019 ukon Anti Graft and Corrupt Practices Act kag Grave Misconduct of a Public Official, matapos ginpatuman ang sharing scheme sa mga benepisyaryo sang Emergency Shelter Assistance ukon ESA.
Sa 18 ka panid nga desisyon sang talatapan sang Ombudsman, ginrekomendar ang pagpahalin sa pwesto kay Barangay Kapitan Junar Bautista matapos napamatud-an nga guilty sa duha sa tatlo ka complaint ngaginpasaka sang mga residente nga dismayado sa ginpatuman nga pagtunga tunga nila sa nabaton nga bulig gikan sa gobyerno sadtong 2015.
Ginkanselar man ang eligibility ni Kapitan Bautista kag ginkuhaan sang retirement benefits kag gindumilian na nga magpungko sa anuman nga talatapan sa gobyerno.
Samtang magluwas sa nasambit nga kapitan, napamatud-an man nga guilty ang pila ka mga himata sini sa paglapas sa section 3 sub paragraph E ng RA 3019 ukon Anti Graft and Corrupt Practices Act matapos nakabenepisyo kag nakigkunsabo sila sa pihak nga indi sila kwalipikado sa nasambit nga bulig.
