LIBAS, ROXAS CITY – Nakapagkit sang labing una nga kaso sang dengue ang Barangay Libas, Roxas City nga nagresulta sang kamatayon.
Sa interview sang Bombo Radyo sa Barangay Kagawad sang Barangay Libas nga si Em-Em Bornaldes, ang wala na ginhingadlan nga biktima ang nagapang-edaron sang 7 ka tuig nga bata nga babaye.
Suno kay Bornaldes, ginkumpirmar sang pamilya sang biktima nga ginbawian ini sang kabuhi sadtong Setyembre 21, 2024 alas 10:00 sang aga.
Dugang pa sini nga antes paman natabo una na sila nga ginpachek-up sa isa ka pribado nga doktor, apang ang findings may yara ini nga Urinary tract infection (UTI) rason nga ginpapauli nila ini sa balay.
Tubtob nga nagluya na ang biktima Setyembre 20 kag diri nila nadesisyunan nga dal-on na sa isa ka pribado nga ospital agud ipa-admit kag diri nahibaluan nga positibo na sa dengue.
Ginpahayag man sang Brgy. Kgwd nga indi man sini nila masiling nga nagikan mismo sa lugar ukon puluy-an sang biktima nagikan ang nasambit nga sakit.
Mahibaluan nga kalakip ang Barangay Libas, sa datos sang Department of Health (DOH) nga may madamo sang kaso sang dengue.
Apang dako ang ila nga pagpasalamat nga sa subong nga bulan nag-amat-amat na nga nagnubo ang kaso sang balatian sa ila lugar bangud sa padayon nga pagpangtinlo sa ila lugar subong man sa mga protokol nga ginapatuman sang ila barangay.
Bangud sini mas ginhugot pa nila suno diri ang ila mga tikang nga ginahimo kalakip na diri ang pagmando sa ila mga Barangay Health Workers (BHW) nga magdouble time sa pagdul-ong kag paghatag ihibalo sa mga pumuluyo sang mga dapat buhaton agud malikawan ang amu nga sakit.
