ROXAS CITY – Ginkumpirmar ni Punong Barangay Mike Agrasada sang Barangay Banica nga nakakumpiskar na sila sang masobra 20 ka mga boga nagikan sa ila mga pumuluyo.
Mahibaluan nga sa pagsug-alaw sang Bag-ong Tuig, nakaangdan na sang kadam-an nga magamit sang palupok apang hugot man ini nga ginadumilian sang otoridad agud malikawan ang mga malain nga insidente.
Sa interview sang Bombo Radyo kay Agrasada, ginpahayag sini nga ang ila mga nakuha nga boga yara nagapabilin sa ila bodega kag ginahulat nga padulungan sang katapo sang Bureau of Fire Protection agud nga waskon kag indi na liwat magamit pa.
Suno sa Punong Barangay, sa pagsugod pa lamang sang Disyembre ginsuguran na nila ang pagpahanumdum kag paandam sa ila pumuluyo nga likawan ang paggamit sang boga kag iban pa nga sahi sang palupok agud indi mangin biktima.
Mahibaluan nga base sa ginpaguha nga datos sang Capiz Provincial Health Office (PHO) may yara na sang 2 ka kaso sang fireworks-related injuries kung sa diin ini ang nagikan sa banwa sang Pilar kag Dumarao nga lunsay mga menor de edad.
