ROXAS CITY – Aminado ang mga Barangay officials sang Brgy. Tanza Sur, banwa sang Panay nga dako nga perwisyo ang nagatumpok nga basura sa ila barangay.
Sa interview sang Bombo Radyo kay Brgy. Kgwd. Larry Orsillo, chairman sang committee on health sanitation, nga ginhatagan na sang aksyon sang ila LGU ang amu nga problema apang nagbalik naman kag padayon ang tawo sa paghaboy sang ila mga basura sa nasambit nga lugar.
Ini bangud, suno sa kagawad nga wala na sang iban pa nga habuyan sang basura kundi dira gid lang sa ila barangay.
May yara naman sang paghinun-anon nga i-segregate sang mga pumuluyo ang ila basura nga madunuton kag indi madunuton, apang wala man nasusunod.
Suno naman kay Punong Barangay Lilibeth Billiones, wala gid nila gina-ekspektar nga ginhimo na nga open dumpsite ang nasambit nga sitio sa ila barangay bangud Materials Recovery Facility (MRF) lang ang ina nga lugar.
Natahap man ini nga magsita sa nagaalabutan nga dumptruck bangud ginapanag-iyahan ini sang ila LGU.
Dugang pa sang kapitan nga ginpalab-ot naman nila ang ini nga problema sa ila munispiyo bangud may nagmasakit na sa balatian nga dengue, apang ginpasara lang kag nagbalik naman sa paghaboy sang basura.
Bangud sini, bilang Kapitan sang Barangay, daw kaangay nga wala na ini may mahimo nga sulosyon sa iya nga lebel.Nagalaum ini nga subong nga palaabuton nga eleksyon, maaksyunan ang ila problema sa basura.
Related story here: https://www.facebook.com/294194440601992/posts/5240764145944972/
