ROXAS CITY – Nangin instant baganihan ang isa ka barangay tanod sang Barangay Culasi, Roxas City matapos ginluwas sa nasunog nga balay ang 82-anyos nga senior citizen.
Wala nagpangduha duha si Kenth Denoman 29-anyos nga sudlon ang nasunog nga balay para maluwas si Rogelia Surigao.
Sa interview sang Bombo Radyo Roxas sa tanod nga si Denoman, ginpahayag sini nga wala sang iban nga nagsulod sa iya pinsar sang amo nga mga inoras kundi ang makabulig kag maluwas ang tigulang.
Antes nagsulod sa nasunog nga balay, ginbasa sini ang habol kag ginsipa ang nakasarado nga pirtahan.
Matapos nga makita ang tigulang sa isa ka hulot, ginsakwat niya ini paguwa sa balay.
Apang natalsikan ang tanod sang nasunog nga wiring sang kuryente sa abaga kag ulo, gani nakabatyag ini sang sakit.
Maswerte naman nga nasugata sini ang abyan nga si Angelo Barlas nga nagbulig sa iya para madala ang tigulang sa nagahulat nga ambulansiya.
