ROXAS CITY – Arestado ang duha ka mga lalaki kalakip na ang barangay tanod sang Barangay 10, Roxas City sa buy bust operation sang Provincial Drugs Enforcement Unit (PDEU) sa pagpamuno ni Col. Julius Balano sa Brgy. Tiza, Roxas City.
Ginkilala ang mga suspek nga sanday Richard Bacas, 46-anyos sang Brgy. Loctugan, Roxas City kag Alfonso Acuril, 50-anyos, barangay tanod sang Brgy. 10, Roxas City.
Sa interview sang Bombo Radyo Roxas kay Col. Julius Balano, team leader sang grupo, ginpahayag sini nga isa ka bulan ang ila nga monitoring sa iligal nga aktibidad ni Bacas, tobtob ginpatigayon ang operasyon matapos makumpirma nga nagaduso ini sang droga.
Kasuno sang pag-aresto kay Bacas ang pagtudlo sini sa tanod nga si Acuril nga ginakuhaan sini sang shabu nga ginabaligya sa iya mga kostomer.
Nahibaluan nga nakasuksok pa sang uniporme sang tanod kag may ID pa si Acuril sang maaresto sang mga pulis.
Ginakabig nga new drug personality ang duha sa diin sadto user lamang ang duha tobtob nangin pusher kag runner na sang droga.
Samtang narekober sa mga drug personalities ang pito ka sachet sang shabu, buy bust money nga P500.00 kag duha ka unit sang cellphone.
