PANITAN, CAPIZ- Opisyal nga gindeklarar nga drug-free ang Barangay Timpas sa banwa sang Panitan, Capiz, base sa datos sang Philippine Drug Enforcement Agency (PDEA).
Sa interview sang Bombo Radyo kay Punong Barangay Teody Degones, iya ginpahayag nga ang kadalag-an sang ila barangay sa kampanya kontra ilegal nga droga nagsugod pa sang administrasyon ni anay Presidente Rodrigo Duterte.
Dugang pa sini, sang naglunsyar sang mas pinasangkad nga kampanya batok sa droga si Duterte, nangin mas aktibo ang Barangay Timpas sa pagpanguna sang Barangay Anti-Drug Abuse Council (BADAC), kag sa kooperasyon sang mga residente kag kapulisan.
Nahibaluan nga isa sa apat ka mga barangay nga nalakip ang amo nga barangay nga gindeklarar sang PDEA 6 nga drug free sa bug-os nga rehiyon. Samtang, ang tatlo pa ka mga barangay amo ang Brgy. Bayuyan, Estancia sa probinsya sang Iloilo, Brgy. Yulo Drive Arevalo kag Brgy, Katilingban Molo sa Iloilo City.
Ginpasiguro man sang opisyal nga padayon ang ila pagbantay kag pagmonitor agud mapabilin nga limpyo sa droga ang barangay. May mga ginapatigayon man nga anti-drug seminars, community outreach, kag youth engagement programs agud malikawan ang pagbalik sang presensya sang ilegal nga droga sa lugar.
Ginalauman ni Kapitan Degones nga ang Barangay Timpas mangin ehemplo sa iban pa nga barangay sa Capiz kag sa bug-os nga rehiyon sa pagpakita sang posibilidad nga magmalimpyo batok sa droga pinaagi sang kooperasyon, determinasyon, kag liderato.
With a report from Bombo Francis Biñas
