Gin-aresto sang Italian police ang isa ka barber sa Italy matapos nga madiskubre nga ginagamit niya ang iya barbershop bilang tabon sang iya negosyo sa pagbaligya sang droga.
Madugay na nga nakabaton sang mga report ang mga otoridad nga may nagakatabo nga drug dealing sa Foce District sa Genoa City apang wala sila sang mabakod nga lead kun diin mismo nagakatabo ang mga ilegal nga aktibidad.
Tungod sini, naglunsyar ang Forte San Giuliano Police Station sang mga surveillance team sa nagkalain-lain nga bahin sang Foce agud mahibaluan kun diin ang baligyaan sang droga.
Isa sa mga surveillance team ang nakadipara nga may isa ka barbershop nga pirme ginasulod sang mga customer nga kalbo kag wala sang balbas.
Sa imbestigasyon nga ginpatigayon sang mga owtoridad, nahibaluan nga ang kadam-an sa mga customers sang amo nga barbershop ang nagakadto lang didto para sa droga. Samtang, may pila man nga nagapagunting matapos magbakal sang drugs.
Sang mapamatud-an nga drug dealer ang 55-anyos nga manuggunting, gilayon nga gin-raid ang balay sini kag nasapwan nga may pila ka gramo sang hashish diri. Sa mismo nga barbershop man sini nasapwan ang 100 grams sang cocaine kag iban pa nga drug paraphernalia.
Sa karon, nakahunong sa karsel sang Marassi prison ang manuggunting kag ginahulat ang iya sini nga sentensiya.
