DUMARAO, CAPIZ- Padayon ang ginapatigayon nga search and rescue operation sang mga kapulisan kag barangay officials para sa bata nga nadula sang anom na ka-adlaw sa Barangay Aglanot, Dumarao, Capiz.
Ang nadula nga bata amo si Rona Mae Carum, 8-anyos, isa ka Grade 2 nga estudyante kag residente sang nasambit nga lugar.
Sa interview sang Bombo Radyo kay Police Captain Tobias Garfin, Hepe sang Dumarao Municipal Police Station, iya ginpahayag nga sang Setyembre 24, nakabaton sang amo nga report ang ila nga talatapan sa diin gilayon man ini nila nga gin-aksyunan.
Suno kay Garfin, wala pa sa gihapon makita ang amo nga bata kag padayon ang ila nga pagpangita upod ang pila pa ka mga natungdan.
Pahayag nya, nagapadayon man ang ila nga talatapan sa pag-imbestigar agud matumod ang kamatuuran kun nadula gid man ang amo nga bata ukon may yara sang nagkuha.
Dugang pa sang natungdan, nagapadayon ang ila nga koordinasyon sa pamilya sang bata kag ila ginapangabay nga makita na inila ini kag kuntani suno sa ila, yara lang ini sa maayos nga sitwasyon.
Interviewed by Bombo Sunnie Mae Constantino Batencila
