Nagahigdaon na kag sunog ang lawas sang isa ka bata sang natulupangdan sang pamilya kag pila ka mga residente matapos ginapahayag nakuryente samtang nagahampang sa sangha sa Sitio Dulunan, Brgy. Mongpong, Roxas City.
Ginkilala ang amu nga bata kay alyas “Justine”, 11-anyos, kag residente sang nasambit nga lugar.
Suno kay Lucyla, magulang sang biktima, ginpahayag nga nagahampang ang iya nga manghod sa sangha kaupod sang pila pa ka mga kabataan.
Dugang pa sini, nga nagtulutambay ini sya sa guwa kag nagdungan pagsulod sa ila nga puluy-an sang mag abot na ang ila nga ginikanan kag nabilin ang iya sini nga manghod sa sangha nga nagahampang.
Apang, sang tion nga ara sila sa sulod, nabatian nalang nila ang singgitan sang mga tawo sa palibot.
Gilayon nila ini nga ginguwa sang iya nga Iloy kag didto nakabaton sila sang tinaga sa pila ka mga residente nga nakuryente si alyas “Justine” kag sang isa pa ka bata nga kahampang sini.
Ginguwa man ini sang ila pagid nga amay, apang gin-una sini nga ginpalong ang main switch antes paman nga nagpadulung sa iya sini nga manghod kag sang isa pa ka bata.
Sang ila na ini ginchekyar, pareho ini nga wala na sang alinto kag gilayon nga gindala sa ospital.
Apang gindeklarar nga dead on arrival si alyas “Justine” kag nagapabilin nga nagapaayo ang isa pa ka bata.
Mahibaluan nga napuruhan sang pagkakuryente si alyas “Justine” bangud suno sa mga residente, ginapahayag nga nagapilit pa suno diri ang live wire sa lawas sang biktima kag nag-angkon sang mga madalom nga pilas sa butkon nga naglatay pakadto sa dughan kag kamot nga nagresulta sa kamatayon sini.
Samtang, suno kay Lucyla, disgrasya ang natabo kag wala man ini nila ginalauman nga madula ang ila sini bugtong nga lalaki nga manghod, apang nagapanuktok ini sila sa mga may mabinulawanon nga tagipusuon kag may sulusobra sang bulig pinansyal.
