Kumpirmado na nga madayon gid ang 2025 Batang Pinoy Games sa pihak sang pagtay-og sang magnitude 7.4 nga linog sa Davao Oriental sang Biyernes, suno sa Philippine Sports Commission (PSC).
Ginkumpirma ni PSC Chairman Patrick “Pato” Gregorio nga safe kag preparado na ang tanan para sa pagpatigayon sang pungsodnon nga kompetisyon sang mga pamatan-on nga atleta nga patigayunon umpisa Oktubre 25 tubtob 31 sa General Santos City.
Ginsiguro ni Gregorio nga preparado na ang syudad sa pagdugok sang linibo ka mga atleta, opisyal, kag bisita para sa Batang Pinoy Games.
Nahibaluan nga magahatag sang bulig ang PSC sa lokal nga gobyerno kag nagkalain-lain nga ahensya sang Philippine National Police, Bureau of Fire Protection, kag Philippine Coast Guard agud masiguro ang kaluwasan sang tanan nga participants.
Ginalauman nga magalab-ot sa 15,000 ka mga kabataan nga atleta ang magapasakop sa 27 ka mga sports sa prestihiyoso nga kompetisyon nga tinutuyo nga hanason ang masunod nga henerasyon sang mga pungsodnon nga atleta.
