Ginbuyagyag ni Batangas 1st District Rep. Leandro Legarda Leviste nga nagbilin ini sang mando sa pila ka mga tawo nga ipahibalo sa publiko ang tanan niya nga mga file pananglitan may matabo sa iya nga malain.
Ginhimo ni Leviste ang pahayag sang bisperas sang Paskwa, pila ka oras matapos niya ginbuyagyag sa publiko ang 19 ka panid nga listahan sang mga proponents sang mga proyekto sang Department of Public Works and Highways (DPWH) sa idalom sang P6.326-trillion 2025 national budget. Apisar nga wala sang partikular nga insertions nga gintalana sang mga mamalidha, ginpakita sang listahan ang minilyon ka “allocable” nga kantidad nga mahimo i-allocate sang tagsa ka kongresista kada tuig.
Suno kay Leviste, bisan sa tion sang paskwa, naga-istoryahanay sa gihapon sila sang iya iloy nga si Senator Loren Legarda sa iya trabaho.
Suno sa iya, ginpahanumdoman niya ang iya iloy sa iya direktiba nga kon may matabo sa iya, dapat i-release ang tanan nga dokumento nga nabilin kag dapat padayunon ang pagbuyagyag sang impormasyon.
Wala naman ginhingadlan ni Lavesti ang mga tawo nga iya gintugyanan. Kaangot sini, ginsambit man sini ang bag-o lang nga kamatayon ni Former DPWH Undersecretary Maria Catalina Cabral nga ginapahayag ginhalinan sang listahan matapos mahulog sa pil-as sa Benguet, insidente nga sa karon gina-imbestigaran sang mga otoridad.
Sa isa ka interview, ginkumpirmar man ni Leviste nga ginpabakod niya ang iya security detail.
