ROXAS CITY, CAPIZ – Ginpakamalaot sang grupo nga Bayan Panay ang State of the Nation Address (SONA) ni President Ferdinand Marcos Jr., bangud sa kapaslawan nga sabton ang mga nagapanguna nga problema sang pumuluyo.
Sa interview sang Bombo Radyo Roxas kay Elmer Forro, Secretary General sang Bayan Panay, iya ginpahayag nga “wala sang unod” ang speech sang Presidente kag kulang sa konkreto nga solusyon sa mga ginasinggitan sang ordinary nga Pilipino.
Suno kay Forro, wala nahatagan sang kaathagan sa SONA ang madugay na nga problema sa serbisyo nga pangkomunidad, kasubong sang kakulangan sa malimpyo nga tubig sa madamo nga komunidad.
Ginpakamalaot man sang grupo ang kakulangan sang plano batuk sa pagmanipula sang mga traders, sa tunga sang padayon nga pagtaas sang presyo sang bugas, kalamay, asin, kag iban pa nga balaklon.
Dugang pa sang natungdan, isa sa mga daku nga isyu nga wala nahinambitan sang Presidente amo ang Coco Levy Fund, nga madugay na nga ginaduso sang mga magniniyog nga mabalik sa ila.
Pahayag pa ni Forro, isa ini ka sahi sang kakulangan sang hustisya para sa mga farmers nga amo ang matuod nga naghulog sang pondo.
Dugang pa sini, wala man nasentro sang Presidente ang isyu sang agrikultura, partikular ang mataas nga presyo sang abono, binhi, kag ang kakulangan sa lokal nga asin.
Pati ang padayon nga importasyon sang produkto nga sarang i-produce diri sa pungsod ang wala man nahatagan sang pagtamod.
Wala man ginpalampuwas sang grupo ang pagtikom sang bibig sang Presidente sa isyu sang illegal gambling, nga ginapahayag padayon nga nagalala kag nagaguba sa kabataan kag komunidad.
Suno kay Forro, kun may grado ang SONA, zero ang Presidente.
Nagapanawagan ang Bayan Panay sang mas maathag, tawhanon, kag konkreto nga aksyon gikan sa administrasyon, agud matuod nga masabat ang problema sang mga ordinaryong Pilipino.
– Interviewed by: Bombo Daren Salomeo Henson
