Ginkalipay sang grupo sang Bayan Panay sa pagpadayon sang impeachment process batok kay Vice President Sara Duterte matapos nadisisyunan sang House Committee on Justice nga ang duha ka mga impeachment complaints sa bise Presidente ang “sufficient in substance.”
Sa interview sang Bombo Radyo kay Mr. Elmer Forro, Secretary General sang BAYAN Panay, iya ginpahayag nga importante ini nga tikang agud mapadayon ang proseso sang accountability sa gobyerno kag mahibaluan ang kamatuoran sa mga alegasyon batok kay Vice President Duterte.
Suno kay Forro, ang desisyon sang House Justice Panel, nagapakita nga may basehan ang padayon nga imbestigasyon kag pag-usisa sa mga ginapangatubang nga isyu sang mataas nga opisyal sang gobyerno.
Samtang padayon ang proseso, nagalaum ang grupo nga mangin transparent kag patas ang pagtalakay sa kaso agud masiguro ang hustisya kag accountability sang mga opisyal sang gobyerno.
