Nag-upod ang Bayan Panay sa duha ka adlaw nga People’s Strike sa Iloilo City nga nag-umpisa subong, Setyembre 29, kag magatakop buwas, Setyembre 30, 2026.
Sa interview sang Bombo Radyo kay Elmer Forro, Secretary General sang Bayan Panay, iya ginpahayag nga padayon ang ila panawagan nga kanselahon ang Oil Deregulation Law kag hatagan sang dugang nga proteksyon ang pangabuhi-an sang mga driver kag operator.
Suno kay Forro, nagakadapat man nga suspendihon ang VAT kag excise tax sa petrolyo ilabi na sa tion sang krisis agud mabuligan ang mga motorista kag iban pa nga apektado sang mataas nga presyo sang gatong.
Dugang pa sini nga indi makaigo ang gamay nga rollback sa presyo sang petrolyo bangud mas daku ang pagsaka sang presyo sang gatong sa nagligad nga mga semana.
Lakip man sa ila panawagan ang pagpataas sang sweldo sang mga mamumugon sa Western Visayas.
