ROXAS CITY, CAPIZ – Dako nga kadalag-an para sa mamumugon sa bilog nga Pilipinas ang pagpasar sang Kamara sang dugang nga P200 sa sweldo sa mga minimum wage workers sa pribado nga sektor.
Sa interview sang Bombo Radyo kay Mr. Elmer Forro, Secretary General sang Bayan Panay, iya ginpahayag nga nagbunga na ang padayon nila nga sakripisyo sa dalanon agud ipabutyag ang kinahanglanon sang mamumugon sa diin mabuhinan na ang madugay nila nga pag-antus.
Nagapangabay si Forro nga indi lang kuntani pa-gwapo ang pagpasar sang House Bill No. 11376 ukon Wage Hike For Minimum Wage Workers Act.
Suno kay Forro, kinahanglan nga tumanon man sang mga senador ang ila promisa nga dulaon ang kaimulon sa Pilipinas kag pinaagi sa pagpasaka sang sweldo sa mamumugon, mabatak ang pangabuhi sang tawo.
Pahayag niya, dapat gani P1,200 ang minimum wage sang mamumugon agud mabuhi sang normal, apang dako na nga development ang dugang nga P200 sa sweldo sa paghagan-hagan sang kapigaduhon.
Nahibaluan nga nakakuha sang 172 votes ang nasambit nga hagna kag sa tion nga ini ang mangin layi, ini ang first legislated nationwide wage hike humalin sang gin-aprubahan ang Wage Rationalization Act in 1989.
