ROXAS CITY – Padayon nga ginabantayan sang Bureau of Fisheries and Aquatic Resources (BFAR) – Capiz ang sitwasyon sang baybayon sang Pilar matapos ang natabo nga pagka-poison sang pila ka mga indibidwal sa nasambit nga lugar.
Sa interview sang Bombo Radyo kay Mr. Edwin Javier, Provincial Fishery Officer sang BFAR-Capiz, suno diri nakakuha na sang water kag meat samples ang Office of the Provincial Agriculturist agud ma-examine kag matumod kun may yara sang presensya sang toxins ang baybayon kag panginhason.
Mahibaluan nga naglab-ot na sa 23 ka persona ang ginpadangat sa ospital magluwas pa diri ang solterito nga napatay matapos makabatyag sang pagpangluya, pagpangbinhod sang kalawasan, pagpalanuka kag pagsakit sang ulo dala sang pagkaon sang tahong.
Ini ang ginakabug-usan sang 4 ka barangay amu ang Barangay Binaobawan, Natividad, Rosario kag Poblacion, Pilar.
Pahayag pa ni Javier, nga ginkumpirmar sang doktor nga positibo sa Paralytic Shellfish Poisoning (PSP) ang mga pasyente nga gina-angut sa posibilidad red tide.
Sa karon, ginahulat pa ang mangin resulta sang water analysis nga posible magaguwa buwas nga adlaw, samtang ang meat samples naman posible magdugay sang isa ka semana nakadepende sa availability sang naga-eksamin sa Manila.
Panugyan naman ni Javier sa publiko, nga likawan danay ang pagkaon, pagharvest kag pagbakal sang panginhason ilabi na nga wala pa nagaguwa ang resulta sang mga meat samples.
