Ginbalita sang Philippine Coast Guard (PCG) subong nga adlaw sang Sabado nga gin-harass sang China Coast Guard kag People’s Liberation Army-Navy (PLAN) ang mga barko sang Bureau of Fisheries and Aquatic Resources (BFAR) nga gin-alalayan sang PCG samtang padulong sa Sandy Cay sa West Philippine Sea.
Sa isa ka statement, ginpahayag sang PCG nga natabo ang panibag-o nga pagpang-harass sang Chinese vessel sa barko sang Pilipinas kahapon, adlaw sang Biyernes, Enero 24.
Suno sa PCG, gin-harass sang Chinese vessels ang BFAR vessels nga Datu Pagbuaya kag BRP Datu Bankaw samtang nagalayag padulong Sandy Cay para maghiwat kuntani sang marine scientific survey kag sand sampling.
Sa kasagsagan sang misyon, suno sa PCG, naka-engkwentro ang mga barko sang BFAR sang agresibo nga maniobra nagikan sa 3 CCG vessels 4106, 5103 kag 4202 nga lantaran nga pagbalewala sa Convention on the International Regulations for Preventing Collisions at Sea, 1972 (COLREGs).
Maswerte nga napunggan ang anuman nga posible nga aksidente sa kasagsagan sang madelikado nga komprontasyon bangud sa kasanayan sa paglayag sang mga crew sang BFAR.
Nagpadala man ang CCG sang mga magamay nga bangka agud iharass ang 2 rigid hull inflatable boats sang BFAR nga nagapadala sang ila personnel sa Sandy Cay.
Apang, nag-aligid man ang PLAN helicopter nga may tail number 24 sa indi safe nga altitude sa ibabaw sang BFAR rigid inflatable boats nga nagatuga suno sang delikado nga kondisyon bangud sa propeller wash sini.
Bangud sini, napilitan ang BFAR kag PCG nga suspendihon ang ila nga survey operations sa lugar.
Sa pihak sini, ginpahayag sang ahensiya nga nagapibilin nga committed ang PCG kag BFAR sa ila mandato kag pagahimuon ang kinahanglan nga mga paghalong agud masiguro ang kaluwasan sang ila personnel kag barko sa pagpatigayon sang scientific research and resource management.
Ang pagpatigayon sang marine survey sa Sandy Cay ang kasunod sang nadiskubre nga durog kag patay nga corals sa Sandy Cay 2 nga suno sa mga eksperto, masami nga ginahimo sang China antes suguran ang reclamation activities sini.
