Gintutukan sang laser sang indi pa matumod nga barko sang China sang anom ka beses nga nagdugat sang 5 minuto ang barko sang Bureau of fisheries and Aquatic Resources (BFAR) nga BRP Datu Tamblot samtang padulong sa Pag-asa Island sa West Philippine Sea.
Natabo ang insidente pasado alas-8 sang gab-i sang Lunes, Disyembre 2 sa bisinidad sang Hasa-hasa Shoal nga yara sa 60 nautical miles halin sa Palawan, apang sini lamang nga dominggo ginpaguwa ang nasambit nga insidente.
Narekord naman sang mga sakay nga crew sang kaupod nga BFAR vessel nga BRP Datu Matanam Taradapit ang nasambit nga insidente gamit ang night-vision camera.
Base sa BFAR, naggamit ang barko sang China sang high-intensity laser nga nagaduag pula apang ang nagaguwa nga sini lila sa mga laragway.
Wala naman sang crew members ang naulamid sa insidente apang nagtuga ini sang palanakit sang ila mata ang laser.
Una, nagtungo sa shoal ang 2 sibilyan nga barko sang BFAR para maghatag sang suplay nga langis kag pagkaon para sa mga mangingisda nga Pilipino nga yara sa lugar kag padulong sa Pag-asa island para sa scientific research.
Samtang, ginbatikos naman sang BFAR ang panibag-o nga maritime aggression sang China.
Sa isa ka statement, ginsiling sang ahensiya nga ang amo nga video ang nagapakita sang reyalidad sa ground nga ginaharass kag masami nga ginaatake sang mga barko sang China ang Philippine vessels nga nagahiwat sang regular nga pagpatroliya sa exclusive economic zone sang Pilipinas taliwas sa pahayag sang Chinese Embassy sa Maynila nga ang mga barko sang pungsod ang nagahiwat sang risgo nga maniobra batuk sa ila mga barko.
Sa karon, wala pa sang ginapaguwa nga pahayag ang National Task Force for the West Philippine Sea nga may kaangtanan sa napabalita nga laser harassment sang China.
