ROXAS CITY – Bilang isa ka rescuer apisar indi nila area of responsibility wala nagduha-duha ang katapo sang BFP-Pontevedra Capiz nga magbulig sa Construction Worker nga natabunan sang duta sa Brgy. Cogon banwa sang Panitan.
Ini ang ginpahayag ni FO1 Rajib Ken Buenvenida sang BFP-Pontevedra Capiz sang mainterview sang Bombo Radyo.
Suno diri, ginhimo nila ang tanan makuha lang ang biktima nga si Rodel Catalan Delfano apang masobra 15 minutos na ang nakaligad antes ini nakuha sa idalom sang duta.
Dugang pa ni Buenvenida, nagpatigayon sila sang Standard Operating Procedure (SOP) antes kuhaon ang biktima kun sa diin ang mga rescuers nagplano kag nagtsekyar sang lugar kun ang biktima ang pwede gilayon makuha ukon makahatag ini sang mas malala pa nga pilas.
Pahayag sini, tuman ka delikado ang sitwasyon sang biktima kag indi ini basta-basta makuha bangud madalom ang duta kag may yara sang kabilya sa likod ni Delfano.
Sang makuha na nila ini, gilayon nga gin-CPR agud nga marevive ang biktima kag ginpasakay sa ambulansya agud madala ini sa pinakamalapit nga ospital.
Nagasimpatya suno diri ang bug-os nga katapo sang BFP-Pontevedra Capiz sa pamilya ni Delfano.
Panugyan pa niya nga maghalong gid ukon sa mga pumuluyo nga nagatrabaho kapareho sang mga construction workers, magsuksok sang mga panapton nga makahatag proteksyon sa lawas.
