Lubos na nga gin-aprubahan sang Bicameral Conference Committee ang P6.793 trilyon nga national budget para sa 2026.
Ginpirmahan sang mga tiglawas gikan sa Senado kag Kamara ang bicameral report matapos ang deliberasyon sa Philippine International Convention Center, Pasay City.
Suno kay House Appropriations Chair Mikaela Suansing, ang budget nagatutok sa human capital development kag transparency.
Ginsambit naman ni Senate Finance Chair Sherwin “Win” Gatchalian nga may daku nga alokasyon para sa edukasyon, ikaayong lawas, kag agrikultura.
Ini ang labing una nga kahigayunan nga ginpatigayon ang bicameral deliberations sa publiko paagi sa livestream.
Tuyo sini nga malikawan ang mga maanomaliya kag madugangan ang pagsalig sang publiko sa proseso sang budget.
Iga-ratipika sang Senado kag Kamara ang bicameral report sa Disyembre 29.
Ginalauman man nga mapirmahan ni Presidente Ferdinand Marcos Jr. ang General Appropriations Act sa una nga bahin sang Enero 2026.
