Lauman na sang mga motorista ang isa pa nga pagtaas sang presyo sa produkto sang petrolyo sa masunod nga semana, (Enero 21, 2025) nga posible nga magmarka sang ikatatlo nga pagtaas sang presyo sang gasolina kag iban pa nga produkto nga petrolyo para sa tuig 2025.
Sandig sa international fuel trading sa nakalgad nga apat ka adlaw, magasaka na sa P2.30 tubtob P2.50 ang pagtaas sa kada litro sang Kerosene, P2.30 tubtob P2.60 naman ang igamahal sa kada litro sang Diesel kag 1.35 tubtob P1.60 sa kada litro sang gasolina.
Isa ka nagapanguna nga nakaapekro sa paghulag sa presyo sang krudo matapos mag-impose sang sanctions ang mga pungsod sang US kag UK batuk sa Russian oil.
Ginalauman naman nga magatuga ini sang pagnubo sa mga export sang gatong nagikan sa Russia nga magapataas sa presyo sang krudo sa bilog nga kalibutan, samtang may yara naman sang adjustment sa mga merkado bangud sa paghina sang supply gian sa isa sa pinakadako nga producer sang gatong sa kalibutan.
Sang Enero 14, 2025, nagpatuman na sang pagtaas ang mga kompanya sang gatong sang P0.80 sa kada litro para sa gasolina kag kerosene, kag P0.90 naman sa kada litro para sa diesel. Ang mga pagtaas nga ini amo ang ikaduha nga round sang pagtaas sang presyo subong nga tuig. Sa karon, ang kabug-usan nga pagtaas sa presyo sang gasolina kag kerosene, P1.80 sa kada litro, kag P2.30 kada litro naman sa diesel.
Samtang, ginalauman naman sang Department of Energy (DOE) nga ang mga kompanya sang gatong ang maga-anunsyo sang opisyal nga mga pagbag-o sa presyo kada Lunes, nga igapatuman sa masunod nga adlaw.
