Naglab-ot na sa 43 ang numero sang mga nabiktima sang palupok ukon firework-related injuries (FWRI) sa pungsod subong nga tuig, ukon gikan sang Disyembre 22 tubtob 6:00AM sang Disyembre 25, 2024.
Sa datos sang Department of Health (DOH), nakabalhag pa sila sang 18 ka panibag-o nga kaso sa pagsug-alaw sang Paskwa subong nga 2024. Mas manubo naman ini kun ikumparar sa 28 ka kaso sadtong Disyembre 25, 2023.
Yara sa 37 ukon 86% ang nabiktima sang iligal nga palupok, kalakip ang boga, 5-star kag piccolo.
Kadam-an sa mga nabiktima ang nagapang-edaron sang 19-anyos panubo nga yara sa 34 ka kaso, samtang siyam ka kaso ang nagapang-edaron sang 20-anyos pataas.
Padayon nga ginapahanumduman sang DOH ang publiko nga sug-alawon ang Bag-ong Tuig nga luwas kag safety.
Ginaganyat man sini ang publiko nga i-report ang mga nagagamit kag nagabaligya sang mga iligal nga palupok kasubong sang boga, 5-star, kag piccolo.
Mas makapamaayo kun indi na maggamit sang mga palupok; indi pagpuluton ukon sindihan ang mga palupok nga nagalapta sa karsada; kag ipalayo sa mga kabataan ang mga produkto nga may lason kag pulbura kasubong sang mga magagmay nga palupok (watusi) bangud mahimo nila ini nga makaon.
Mas maayo man nga maggamit sang mga alternatibo nga pampagahod kasubong sang torotot, kaldero, ukon mag-karaoke kaupod ang pamilya kag mga abyan kag bantayan ang mga anak kag iban nga kabataan agud masiguro nga indi sila makagamit sang mga palupok.
Mahimo man nga maglantaw na lamang sang community fireworks display gikan sa mga local government units (LGUs).
