Magapaguha sang bag-o nga EP ang BINI, ang sikat nga Filipino girl group, subong nga Pebrero nga nagapakita sang isa ka collaboration kaupod ang South Korean artist kag anay miyembro sang DAY6 nga si Jae Park.
Ginpakigbahin man ni Jae, ukon Eaj, kung sa diin ginrepost niya ang anunsyo nagikan sa Philippine Concerts angut sa iya kolaborasyon sa sikat nga girl group sa isa ka kanta nga may tig-ulo “Secrets.”
Bangud sini, indi naman matupungan ang kasadyahan kag excitement sang mga fans sang BINI kag ni Jae nga nagpakita naman sang ila hugot nga pagsuporta sa comment section.
Samtang ginanunsiyo sang BINI ang ila bag-o nga EP ”BINIverse” sa ila Grand BINIverse nga The Repeat concert sa Philippine Arena sadtong Pebrero 15.
Mahibaluan nga igapaguha ini sa Pebrero 27, 2025.
Samtang sa isa naman ka facebook reel, nagpaguha ang grupo sang isa teaser para sa EP, kung sa diin ginsiling nila nga mag-angkon ini sang anum ka kanta, kalakip na ang ila mga nauna nga single nga “Cherry On Top” kag “Blink Twice.”
Bangud sa bag-o nga music, magasugod man ang BINI sang ila labing una nga world tour subong nga tuig, sa Singapore, Dubai, London, kag USA.
Samtang, si Jae Park, nga nangin miyembro sang DAY6 sumugod 2015 tubtob sa iya paghalin nagikan sa JYP Entertainment sadtong 2022, padayon sa gihapon nga maimpluwensya sa music scene.
Kilala ang DAY6 sa ila mga hit songs nga “Congratulations” kag “You’re Beautiful.”
Pagkatapos sini nga maghalin sa grupo, ginsuguran ni Jae ang iya solo career kag ginpaguha ang single nga “Car Crash” sadtong 2022.
