ROXAS CITY – Ginbuka sang wala makilan-an nga kawatan ang bintana sang isa ka salakyan sa Rizal Street, Barangay V. Roxas City.
Sandig sa nakuha nga impormasyon sang Bombo Radyo kay Beng, ginabulubanta nga takna alas 4:00 kaina sang kaaganhon natabo ang pag ransak kun sa diin nadiparahan nalang sang pakaisa sini nga ginwasak na ang bintana sang Mitsubishi Expander nga salakyan nga nagaduag pula.
Dugang pa sini, ulihi na nadiparahan sang pakaisa sini nga lalaki nga wasak kag ginbuka ang bintana sang amu nga salakyan kun sa diin nataban sang amu nga kawatan ang duwa ka bag nga may unod nga 2 ka notebook nga columnar kag mga resibo.
Ginabulubanta naman nga naga lab-ot sa kapin 8,000 tubtob 12,000 pesos ang balor sang kahalitan sang amu nga salakyan.
Sa karon, nagapadayon pa ang imbestigasyon sang mga kapulisan angut sa nasambit nga insidente.
