ROXAS CITY – Pasado na sa ikaduha nga pagbasa sa sesyon sang Roxas City Council ang ginaduso nga ordinansa ni City Councilor Cora Balgos-Tianco nga magadeklarar bilang important cultural property kag local heritage site sang balay kun sa diin ginbun-ag ang anay presidente sang pungsod nga si Manuel Roxas.
Matapos nga ginpresentar ni Tianco ang resulta sang ginpatigayon nga committee hearing sang iya ginapamunuan nga Committee on Tourism, Promotion and Development angut sa hagna, nagpaidalum pa ini sa deliberasyon sang konseho antes nila gin-aprobahan sa second reading sa ila sesyon kahapon nga adlaw.
Sa interview sang Bombo Radyo, gintuad ni Tianco nga ginpangabay sa iya ni City Tourism Officer Bryan Marie Argos ang pagpasar sang ordinansa bangud ini man ang magaserbe sa ulihi nga balasehan sang National Commission on Culture and the Arts sa ila mangin tikang angut sa pagprotehir kag pagpreserbar sang makasaysayan nga duog.
Suno pa sa konsehala, posible nga mabaligya sang nagapanag-iya karun nga pamilya Albar ang amo nga propedad rasun nga kinahanglan nga makahimo sang nagakaigo nga tikang ang gobyerno sa labing madali nga panahon agud ini ang masalbar.
Ang balay nga nahamtang sa corner Rizal-Zamora Streets kun sa diin ginbun-ag si Roxas sadtong Enero 1, 1892 ang una na nga ginpahamtangan sang marker sang National Historical Institute.
