ROXAS CITY – Para sa tanan ang kurso nga Civil Engineering.
Ini ang ginpahayag ni Engineer Madrigal Mandalawi, ang bag-o nakapasar sa ginhiwat nga Civil Engineer Licensure Examination, nga residente sang Barangay Maninang, banwa sang Sapian.
Sa interview sang Bombo Radyo kay Mandalawi, ginpahayag sini nga apisar mahina ang isa ka estudyante sa subject nga Mathematics, kun may yara ini sang perseverance, passion kag dedikasyon sa pagtuon, wala sang imposible nga makatapos ini sa kurso nga engineering kag makapasar sa pasinawan.
Ginbuyagyag man sini nga nag-abot man ang tinion nga nabudlayan na gid ini sa iya nga pag-review apang gintatak niya sa iya painu-ino nga malampuwasan gid sini ang tanan nga pagtilaw.
Gingamit sini nga inspirasyon ang iya pamilya kag ang mga nagasalig nga mga tawo sa iya palibot.
Mensahe sini sa mga naga-aspirar nga mangin isa ka enhinyero kag sa mga wala ginsuwerte sa nasambit nga eksaminasyon, nga padayon sa pag-abot sang handum, kun wala man nangin madinalag-on ang imu plano sa kaugalingon, panigurado nga mangin madinalag-on ang plano sang Makaako para sa imo.
