Blended Learning, luyag pabaskugon sang DepEd subong nga panahon sang bagyo

Ginaduso sang Department of Education (DepEd) ang Blended Learning subong nga panahon sang tag-ululan.

Suno kay Education Secretary Sonny Angara, dako ang mabulig sang Blended Learning agud mangin dalayon ang pagtuon sang mga estudyante apisar nga may bagyo ukon baha.

Mahimo man suno diri nga magpatuman sang Saturday class ang mga buluthuan agud makalagas sa mga lessons ang mga estudyante nga naapektuhan sang kalamidad.

Ginkumpirmar naman ni Angara nga 841 nga mga eskwelahan ang wala nakasugod sang klase subong nga adlaw, matapos ang pagpanglaslas sang Bagyong Carina kun sa diin 800,000 nga mga estudyante ang naapektuhan.

Sa pihak sini, 98% suno diri nga nga eskwelahan sa pungsod ang nakasugod na sang ila klase subong nga adlaw sang Lunes.