Isa ka talagsahon nga total lunar eclipse ang makit-aN sa bug-os nga Pilipinas subong nga gab-i.
Suno sa Philippine Atmospheric, Geophysical and Astronomical Services Administration (PAGASA-DOST), magasugod ang total eclipse mga alas 7:04 sang gab-i, magalab-ot sa pinakamataas nga peak alas 7:34 sang gab-i, kag magatapos alas 8:03 sang gab-i, nga may kabug-usan nga kalawigon nga mga 59 minutos.
Ang lunar eclipse nagakatabo kUn ang Earth nagaagi sa tunga sang adlaw kag bulan, nga nagaresulta sa pagtabon sang landong sang Earth sa bulan.
Sa tion sang kabug-usan, ang bulan nagapula nga duag, nga ginatawag nga “Blood Moon” bangod ang atmosphere sang Earth nagasala sang kapawa gikan sa adlaw, nga nagabalabag sang malip-ot nga asul nga mga wavelength kag nagatugot sa pula nga kapawa nga makalab-ot sa bulan.
Makit-an ang total lunar eclipse indi lamang sa Pilipinas kundi mangin sa East Asia, Australia, Central Pacific, kag sa kalabanan nga bahin sang Amerika. Sa Manila, magabutlak ang bulan mga alas 5:58 sang hapon, partially eclipse, kag lubos nga magagwa sa penumbral shadow mga alas 10:25 sang gab-i.
Suno sa weather specialist, ginalauman nga generally fair ang panahon sa bug-os nga bahin sang pungsod, gani maathag nga makita ang eklipse.
Ginklaro man sang mga eksperto nga wala sang dapat kahadlukan ang ginatawag nga Blood Moon, kabaliskaran sa mga daan nga superstisyon nga naga-angot sini sa malain nga mga hitabo.
Ini nga hitabo isa sa labing ginapaabot nga mga hitabo sa astronomiya sang tuig.
Indi pareho sa solar eclipse, nga makita lamang sa makitid nga bahin sang kalibutan, ang lunar eclipse makita sang tanan sa gab-i nga bahin sang Earth.
Para sa mga Pilipino, isa ini ka kahigayunan nga masaksihan ang katahum sang kinaugali kag mapadalom ang ila interes sa astronomiya kag kaanggid nga mga pagtuon.
