ROXAS CITY – Ginpahayag ni board member Jonathan ‘Sonny’ Besa nga pagpang-atake sang iya integridad kag pagkatawo ang kaungdan sang igadul-ong nga privilege speech ni board member Atty. Eleuper ‘Bulilit’ Martinez sa ila nangin sesyon, rason nga nagpamalabag ini nga ma-avail ni Martinez ang ila privilege hour.
Sa interview sang Bombo Radyo kay Besa, ginpanindugan sini nga sandig sa section 99 sang ila Internal Rules and Procedure, nakasaad nga dapat ipaiway ang pampersonal nga pagpang-atake kundi pagatalakayon ang mga isyu kag panindugan sang kada miyembro sang Sangguniang Panlalawigan.
Bangud sini, nagapati si Besa nga ang kaungdan sang diskurso prebilihiyo ni Martinez amu ang pagpang-atake kag pagkuwestyon sang iya panindugan kag motibo sa ila ginatalakay nga isyu sa session hall.
Matandaan nga may kaangtanan ini sa pagtalakay kag pagkuwestyon ni Besa sang wala pa mapapasar nga Annual Investment Plan (AIP) nga kabahin sang 2022 budget.
