ROXAS CITY – Wala na dapat ginkuwestyon ni Board Member Jonathan ‘Sonny’ Besa ang ginpang-alokar nga pondo sa 20% sang Annual Investment Plan (AIP) bangud gin-aprubahan na sang Provincial Development Council (PDC).
Ini ang ginpahayag ni Board Member Eleuper ‘Bulilit’ Martinez, sa natabo nga session sang Sangguniang Panlawigan kag sang mainterview sang Bombo Radyo.
Suno diri, wala nagasunod si Besa sa ila internal rules sang Sanggunian matapos nga nagdeliver sang committee report ang chairman sang committee on economic affairs nga si board member Karen Palomar, nagadiskusyon na si Besa sa first reading.
Natingala man si Martinez sa ginpakita nga aktwasyon ni Besa bangud madugay naman ini bilang board member.
Ginpahayag pa sini nga ang maayo nga himuon ni Besa amu ang mangin-neutral ukon kun luyag gid sini nga mag-oppose, nagakinahanglan nga mag-resign nalang ini nga ex-officio member sang PDC.
Ginapunto ni Martinez, nga indi kuntani magdoble-kara si Besa pag-abot sa AIP.
