ROXAS CITY – Nagaapelar si second district board member Atty. Eleuper ‘Bulilit’ Martinez sa iya mga kaupdanan sa provincial board nga pungkuan kag himay-himayon ang ila findings, antes ang pagpapasar sang resolusyon nga nagarekomendar sa pagpasaka sang kaso sa Ombudsman batuk kay Governor Esteban Evan Contreras, Provincial Administrator Edwin Chinel Monares kag OIC sang RMPH nga si Dr. Edmarie Tormon.
Ini ang ginpahayag ni board member Martinez, sang mainterview sang Bombo Radyo.
Suno diri, bilang abugado, nagakadapat nga ipaagi sa legal nga proseso ang nasambit nga tikang.
Ginakabig man sini nga abyan ang chairman sang committee on appropriations nga si board member Jonathan Besa, apang indi man maayo nga daw kaangay sa nagaguwa nga ‘one man report’ ang findings kag indi committee report.
Ginklaro man sini nga wala ini nagadampig sa executive department, sa pagkamatuod, nagbanggianay man sila ni PA Monares, apang luyag lang sini nga madiskusyunan sa ila bahin ang amu nga findings, antes pagaaprubahan ang isa ka resolusyon.
Matandaan nga nag-ugat ang tikang nga pagpasaka sang kaso sa Ombudsman batuk sa nasambit nga mga opisyal bangud sa kapaslawan sang executive department nga magsumiter sang nagakaigo nga dokumento kag magtambong sa ginpatigayon nga headcount kag committee hearing, agud maklaro ang pila ka mga alegasyon nga kurapsyon.
