ROXAS CITY – Dismayado si BM Eleuper Bulilit Martinez nga wala ini makadeliver sang iya diskurso prebelihiyo matapos nga ginpamalabagan ini ni BM Jonathan Sonny Besa.
Suno kay Martinez, ginatadlong lamang niya ang sala nga interpretasyon ni Besa sa Art. 114 sang local government code kag luyag lang sini nga ipa-intindi ang iya responsibilidad bilang chairman sang committee on appropriation kag bilang isa ka Board Member nga ginpili sang mga pumuluyo sa probinsya sang Capiz.
Dugang pa sini, indi niya intensyon ukon hungod samaron ang pagkatawo ni Besa kag ginapangayuan niya ini sang pasaylo kun nasakit niya ang balatyagon sini.
Samtang, ginsiling man sini nga kun responsable nga Board Member si Besa indi ini mangin arogante kag sundon kun anu ang iya nga ginapatihan.
Ginpahanumdum man ni Martinez si Besa nga asta sa karun wala pa na-sweldohan ang mga empleyado sang Roxas Memorial Hospital (RMPH) kag ang iban pa nga mga staff sang Board Member bangud wala pa na-aprubahan ang budget para sa subong nga tuig.
