ROXAS CITY – Halos indi makapati ang isa ka board passer matapos nga nakapasar ini sa PRC Medical Examination nga ginpatigayon sang damlag lang.
Suno kay Dr. Stephanie Obienda Palacios nga tuman ang iya kalipay matapos nga nabal-an kag nakita sini ang pangalan sa listahan sang mga nakapasar sa nasambit nga eksaminasyon.
Bangud diri, gilayon sini nga ginpahibalo ang “good news” sa iya nga pamilya partikular sa iya iloy nga isa man ka doctor kag sa iya amay.
Ginpahayag pa ni Palacios nga “first time” niya nga nagkuha sang amo nga eksaminasyon kag indi man ini nangin madali para sa iya.
Dugang pa sini nga adlaw-adlaw ini naga-review agud mangin preparado sa amo nga eksaminasyon.
Nagpahanumdom man ini sa tanan nga mga nagahandum nga mangin doktor nga dapat preparado ini sa bisan anuman nga aspeto sang kabuhi physical, mental kag spiritual man ini.
Mahibaluan nga bata pa lamang ini handum na sini nga mangin isa ka doktor agud makabulig sa mga pasyente kag mabuligan sa ila ginasuprehir nga balatian.
Ginpahayag pa sini nga himuon niya ang tanan agud nga mangin maayo nga doktor.
Samtang nagapasalamat naman ini sa Diyos kag sa iya pamilya nga padayon nagasuporta sa iya humalin nga siya pa ang naga-eskwela.
Sa karon madamo na ini sang plano sa kabuhi kag naka-focus na ini subong sa iya nga professional career.
