PILAR, CAPIZ – Preparado na ang Barangay Balogo sa banwa sang Pilar, Capiz para sa boat distribution nga isa sa mga nagapanguna nga programa sang Capiz Provincial Bantay Dagat.
Sa interview sang Bombo Radyo kay Mr. Glenn Beup, Supervisor sang Capiz Provincial Bantay Dagat, ginpahayag sini nga padayon ang mga programa kag inisyatibo sang probinsya sa idalom sang liderato ni Gobernador Fredenil H. Castro.
Suno kay Beup, nakahanay na ang mga aktibidad para sa pagtanom sang kapin 300 ka puno sang lubi nga Catigan Dwarf kag tall variety.
Ini nga mga kahoy igatanom sa palibot sang sapa nga may lapad nga kapin 3 kilometros both sides.
Sa banwa sang Panit-an, handa naman ang mga lugar para sa kapareho nga aktibidad.
Dugang pa sang natungdan, nga isa ini ka paagi agud mapabakod ang lupa sa kilid sang mga sapa kag malikawan ang pagbun-od ukon erosion, nga masami nga rason sang pagbaha sa mga kabaranggayan ilabi na kon tag-ulan.
Nagpasalamat man ang Provincial Government sang Capiz sa suporta sang Capiz Provincial Bantay Dagat kag sang kalubihan kag kamaisan staff, nga nangin instrumento sa staking kag layout sang mga lugar nga pagatamnan.
