Ginpahayag sang Bureau of Customs (BOC) nga napaslawan sila nga maangkon ang kabug-usan nga target sang koleksiyon para sa una nga siyam ka bulan sang 2024 bangud sa mga pagbag-o sa polisiya sang damlag lang.
Base sa preliminary data, halin Enero tubtob Setyembre subong nga tuig, ang BOC ang nakakolekta sang P690.842 billion nga revenue.
Apisar nagapakita ini sang 4.61% nga pagdabong ukon P30.454 billion nga pagtaas kun ikumparar sa P660.388 billion nga nakolekta sa kapareho nga panahon sadtong nakaligad nga tuig, ginpahayag sang BOC nga ang latest revenue collection sini ang kulang sang 0.44% gikan sa target sini.
Ang Development Budget Coordination Committee (DBCC) ang nagtalana sang P693.888 billion target halin Enero tubtob Setyembre 2024. Nagakahulugan ini nga ang P690.842 billion collection ang mas manubo sang P3.046 billion sa target.
Suno sa BOC, ang pagpatuman sang Executive Order (EO) No. 62, nga nagbuhin sa tariff rate para sa bugas sa 15% halin 35%, ang nagresulta sa revenue loss nga P6.089 billion gikan sa rice imports.
Ginpalawig man sang EO 62 ang zero-import duties sa idalom sang EO 12 agud ilakip ang battery electric vehicles (BEVs), hybrid electric vehicles (HEVs), plug-in HEVs, kag specific parts and components, nga nagresulta sa dugang nga revenue loss nga P2.901 billion.
