ROXAS CITY – 100 porsyento na nga preparado ang mga medical doctors, dentist, pharmacist kag medical volunteers para sa Bombo Medico 2019 nga patigayunon buwas, Hulyo 14, sa Capiz Gymnasium sa Villareal Stadium sa Barangay Tiza, sining syudad.
Ang Bombo Medico 2019 ang isa ka corporate social responsibility sang Bombo Radyo Philippines ang dululungan nga patigayunon sa mga lugar sa Pilipinas nga may yara sang Bombo Radyo kay Star FM Stations.
Ang Bombo Medico 2019 ang magasugod las 6 sa aga kag nagatuyo nga mabuligan ang mga pigado nga mga indibidwal nga nagakinahanglan sang medical attention.
Lakip sa mga igatanyag nga libre nga medical kag dental services sa Bombo Medico 2019 amo ang tooth extraction ukon gabot sang ngipon, libre nga eye glasses kag eye check-up, check-up para sa mga may balati-an sa dalunggan, ilong kag tutunlan.
May yara man sang igapanghatag nga bulong ba-se sa resulta sang medical check-up kag may ipanghatag man nga mga crutches.
Magluwas sa medical kag dental services, may igatanyag man nga libre nga haircut ukon libre nga paggunting sang buhok, masahe kag iban pa.
Nahibaluan nga kapin sa 1.5 milyones pesos nga balor sang bulong ang igapanagtag sang Bombo Radyo Roxas sa mga pasyente nga maga-avail sang libre nga medical kag dental check-up buwas nga adlaw .
Apang sa kabug-usan magapanagtag sang kapin sa 22 milyones pesos nga balor sang bulong ang Bombo Radyo Philippines nationwide.
