ROXAS CITY – Ginkilala sang Roxas City Council ang Bombo Radyo kag Star FM Roxas bangud sa madinalag-on nga Bombo Medico 2019 nga ginpatigayon sa Capiz Gymnasium – Villareal Stadium.
Sa privilege speech ni City Councilor Midelo Ocampo sa ila nga regular session, ginrekomendar sini ang pagpapasar sang isa ka resolusyon agud hatagan sang komendasyon ang Bombo Radyo kag Star FM Roxas nga gilayon naman ginpaboran sang konseho.
Sa iya nga mensahe, gindayaw ni Ocampo ang nasambit nga aktibidad kun sa diin ang Bombo Medico ang nagpanghatag sang libre nga bulong para sa mga may balatian, libre nga gabot sang ngipon kag madamo pa nga ginpasangkad nga mga serbisyo para sa mga pigado.
Dako suno sa iya ang nabulig sini sa kadamuon nga ginapangatubang nga problema sa karon sang siyudad sang Roxas.
Suno pa sa konsehal nga sa kabug-usan nga 6, 700 ka mga benepisyaryo sang amo nga aktibidad, halos 70 porsyento diri ang lunsay residente sang siyudad.
Gindayaw man sini ang iya kaupod sa konseho nga si City Councilor Dr. Cesar Yap Jr. nga isa sa mga doktor nga naghatag sang libre nga serbisyo sa Bombo Medico.
